【佳作十一】  稻仔教我的代誌 (＊閩南語)                                        作者 林淑美

        「美仔！外口風佮雨，你一个人佇新竹愛細膩哦！」電話中，是阿爸對台南敲來滿滿的關心。「阿爸！阿今年的晚稻，毋是會當割囉！這聲拄著風颱，欲按怎？」我對喙共問。阿爸應講：「唉！天公食賰的，才予咱啦！好啦！我欲去稻仔園巡看覓咧！」嘟嘟嘟...，話切斷。眼前浮起，阿爸穿雨幔、雨鞋、戴葵笠仔，佇田頭破水路敨水的形影。耳空邊勻勻仔響起的是賴和的＜月光＞「月光露水重，晚稻一定好，那知望花時，風颱忽來做，粟粒勿結漿，空存稻仔稿，早冬著蟲害，晚冬又收無。」這敢是做檣人宿命，汗流糝滴的辛苦，換來的毋是予一家伙仔三頓燒，煞是天公做主風颱一掃，稻仔倒、浸水暴芽的後果！

        會記得細漢，上畏去稻仔園做檣。播秧仔的時，阿爸向甲腰攏無才調伸勻；秧仔當咧大要常在去巡田添水，親像咧顧細囝咧！拄著 12 月天跤踏佇湳塗，田水 甲予人起畏寒；若咧挲草，阮遮囡仔四常戇戇共秧仔佮草仔枝同齊剾，害阿爸就閣貼栽加一擺工！

        雖罔做檣艱苦，不而過等到秧仔焦 tiú硬插，隨風搖擺軟腰枝，綴著風姨三行二步退咧跳探戈，青色的舞池，天然的日頭光閃爍，阮的心內是滿滿的歡喜，因為這支舞是慰勞阮辛苦的代價！

        稻子一日一日大，等伊灌漿飽穗。有的頭頕頕，有的 ，阿爸講：「飽穗的稻仔頭犁犁，人愛有內才；毋通親像半罐豆油嚓嚓趒。」原來，人生的哲理大自然用性命教我啥叫謙卑！割稻仔期一到，規家伙仔總動員，黃錦錦的粟仔海，搖搖擺擺等待主人。「轟隆隆！」割稻仔機一開，一目囁仔規坵田若咧剃頭咧，對垂到肩胛頭的長頭毛剃到賰五分仔頭，看起來閣不止仔精彩！規家的食穿，就看這擺的收成。粟鳥仔佇後壁對咧啄米「一枝草，一點露」天飼人，人分張予萬物，這毋但是善的開始，閣較是愛的循環。

        阮是上幸福的囡仔，新米對米絞提轉來，阮就聽好食著今年上鮮的第一喙。阿母共倒咧鍋仔內三兩仔手稍汰一下，囥入電鍋等伊生米煮成飯。邊仔的清水潘留落來盈暗洗面清油垢，是上天然的化妝品。「pho1 lo3 pho1 lo3」 電鍋邊仔的水氣沯沯滾，白煙一陣一陣對墘仔衝出來。「phiak4」阮兄妹仔早就捀碗咧邊仔挲跤撚手囉！阿母講：「愛翕一時仔，等米心予透！」hânn！阮喙箍早就咧 tshuah4 囉！母仔毋甘這陣囡仔大細枵餓，是緊提二粒雞卵出來，佇雙耳鼎倒寡麻油，等油熱，卵共敲落，pi1 pi1 phiak4 phiak4 的雞卵，佇咧鼎內堅做赤赤的卵包，阿母紲手共撒寡鹽花仔，托起來 仔頂，這聲喙瀾真正插插滴囉！

        碗內貯著今年阿爸收成的新米，阿母煎的卵包，閣共垂幾滴仔豆油，卵包拄予破，卵仁勻勻仔共新米包牢咧！軟 Q 啊！軟 Q 啊！綿綿閣含水！阿爸、阿母是青盲牛，不而過 共會當予阮的愛攏囥佇這碗飯內底。阮兄妹仔就親像予卵仁包牢的新米，佇阿爸、阿母的疼惜，有一日嘛會成做飽穗的稻仔，勇敢面對風颱的耍盪。